యువ సంచలనానికి టీమిండియాలో నో ఛాన్స్‌? వైభవ్‌పై మాజీ క్రికెటర్‌ కీలక వ్యాఖ్యలు

ఐపీఎల్‌లో అద్భుత ప్రదర్శనతో క్రికెట్‌ ప్రపంచం దృష్టిని ఆకర్షించిన 15 ఏళ్ల యువ సంచలనం వైభవ్‌ సూర్యవంశీకి భారత టీ20 జట్టులో మాత్రం ఆశించిన స్థాయిలో అవకాశాలు రావడం లేదన్న అభిప్రాయం సర్వత్రా వ్యక్తమవుతోంది. అతడి ప్రతిభపై ఎలాంటి సందేహాలు లేకపోయినా, ఇప్పటికే జట్టులో స్థిరపడిన ఆటగాళ్ల కారణంగా తుది జట్టులో చోటు దక్కించుకోవడం కష్టంగా మారింది. ఈ పరిస్థితిపై భారత మాజీ క్రికెటర్‌ మురళీ కార్తీక్‌ స్పందించాడు. అంతర్జాతీయ క్రికెట్‌లో ప్రతిభతో పాటు పోటీని ఎదుర్కోవడం కూడా ముఖ్యమని, కొన్నిసార్లు వాస్తవాన్ని అంగీకరించి ముందుకు సాగాల్సి ఉంటుందని పేర్కొన్నారు.

భారత ఓపెనింగ్‌ జోడీ అభిషేక్‌ శర్మ, సంజూ శాంసన్‌ ప్రదర్శనలో కొంత అస్థిరత ఉన్నప్పటికీ, జట్టుకు విజయాలు అందించిన ఆటగాళ్లను కేవలం మార్పు కోసం పక్కన పెట్టకూడదని కార్తీక్‌ అభిప్రాయపడ్డాడు. మార్పు చేయాలంటే దానికి సరైన కారణం ఉండాలని అన్నాడు. జట్టు కూర్పులో మార్పులు నిరంతరం జరుగుతుంటాయని, అయితే అవి అవసరమైనప్పుడు మాత్రమే జరగాలని స్పష్టం చేశాడు.

వైభవ్‌ పరిస్థితిని వన్డేల్లో యశస్వి జైస్వాల్‌ ఎదుర్కొంటున్న పరిస్థితితో కార్తీక్‌ పోల్చాడు. ప్రతిభావంతులైన ఆటగాళ్లు జట్టులో ఉన్నప్పటికీ, ఇప్పటికే స్థిరపడిన ఆటగాళ్ల కారణంగా వారికి తరచూ తుది జట్టులో అవకాశం దక్కడం లేదని వివరించాడు. వైభవ్‌తో కోచ్‌ గౌతమ్‌ గంభీర్‌, కెప్టెన్‌ శ్రేయస్‌ అయ్యర్‌ మాట్లాడుతున్నారని, అతడికి సరైన సూచనలు ఇస్తున్నారని భావిస్తున్నట్లు చెప్పాడు. ఇతర ఆటగాళ్లు బాగా ఆడుతున్నప్పుడు వైభవ్‌కు అవకాశం రాకపోవడం దురదృష్టకరమే అయినా, దాన్ని అర్థం చేసుకోవాలని సూచించాడు.

మరోవైపు, టీ20 ప్రపంచకప్‌ 2026లో టోర్నమెంట్‌ అత్యుత్తమ ఆటగాడిగా నిలిచిన సంజూ శాంసన్‌ ఇటీవల తన ఫామ్‌ను తిరిగి అందుకున్నాడు. గత 10 మ్యాచ్‌ల్లో నాలుగు అర్ధశతకాలు సాధించి విమర్శకులకు సమాధానమిచ్చాడు.